Откриј ја Македонија

Македонија, со своето длабоко вкоренето културно наследство, недопрената природа и вековните традиции, нудиизвонредно туристичко искуство за сите членови на дијаспората кои сакаат да ја почувствуваат својата татковина одблизу. Подолу се претставени некои од најзначајните туристички локации што вреди да ги посетите.

Бигорски Манастир – Вечната духовност на Мијачијата

Еден од најсветите и најимпресивни православни манастири во Македонија е Бигорскиот манастир, сместен високо над реката Радика во срцето на Националниот парк Маврово. Основан во 1020 година, со повеќе од илјада години историја, манастирот е познат по својот маестрален иконостас – ремек дело на мијачките дрворезбари. Денес тој претставува жив духовен центар, каде што традицијата и монашкиот живот се чувствуваат во секој негов агол.

Куќата на Мијаците – Сведоштво за еден горд народ

Под самиот манастир, во живописното село Битуше, се наоѓа Куќата на Мијаците, етнолошки музеј кој ја отсликува културата и животот на мијачкиот крај. Внатрешноста го прикажува традиционалниот стил на градба, носиите, накитот и занаетите, кои сведочат за богатото наследство на овој народ. Тоа е место каде историјата оживува низ приказни и атмосфера што мора да се доживее лично.

Бањите во Дебар – Топлината на природата и обновата

Во близина на градот Дебар се наоѓаат двете прочуени бањи, Косоврашка Бања и Бањиште. Овие термални извори, познати уште од антички времиња, се користеле за лекување на разни заболувања и за целосна телесна регенерација. Денес, со модернизирани објекти, сместувачки капацитети и спа-услуги, бањите претставуваат вистински избор за одмор и здравствена нега. Се смета дека по својата лековитост се први во Европа, а трети во светот.

Галичник – Срцето на традицијата и македонската свадба

Галичник е село кое плени со автентична архитектура, камени куќи и традиции стари со векови. Светски е познато по Галичката свадба, културен настан кој секое лето ја оживува древната свадбена церемонија на Мијаците. Ова место е вистински жив музеј, каде што секој камен и секоја песна ја носат гордоста и историјата на народот.

Лазарополе

Во рамките на општината Маврово-Ростуше, Лазарополе се истакнува како второ по големина мијачко село со особена природна убавина. Тука може да се откријат бројни цркви и археолошки локалитети, како и пештерата Калина дупка на планината Бистра. Најзначаен празник е Илинден, кој се одбележува секој почеток на август и претставува посебно доживување за посетителите.

Маврово – Рекреативен рај во сите сезони

Националниот парк Маврово, најголемиот во земјата, е богат со планини, езера и шумски предели. Мавровското Езеро, алпските села и ски-центарот го прават овој регион идеален за одмор во сите сезони, било тоа да е скијање, пешачење или едноставно уживање во природата.

Ски-центарот Маврово е еден од најпознатите во Македонија. Со повеќе од 25 километри уредени патеки, современи жичари и можност за ноќно скијање под рефлектори, тој е омилена дестинација и за почетници и за искусни скијачи.

Охрид – Балканскиот Ерусалим и Македонскиот бисер

Охрид е град под заштита на УНЕСКО со повеќе од две илјади години историја. Со античкиот театар, Самоиловата тврдина, црквите „Св. Софија“ и „Св. Наум“, како и со старите охридски занаети, градот нуди неповторлива комбинација од култура, духовност и природна убавина. Охридското Езеро, најстарото во Европа, внесува мир и инспирација за секој посетител.

Посебно место зазема црквата Свети Јован Богослов – Канео, сместена на карпа со волшебен поглед кон езерото. Нејзиниот шарм и духовност ја прават една од најпознатите и најфотографирани цркви на Балканот.

Крушево – Градот на слободата и музиката

Крушево, највисокиот град на Балканот, е симбол на борбата за македонската слобода. Тука се наоѓа музејот на Илинденското востание и Меморијалниот центар на Тоше Проески. Неговата архитектура, традиционални куќи и културни настани му даваат неповторлив шарм. Градот е исто така познат по параглајдерството и планинарењето, кои привлекуваат многубројни авантуристи.

Кокино – Астрономско светилиште од бронзеното време

Кокино, сместено на 1.030 метри надморска височина во североисточна Македонија, е древна мегалитна опсерваторија стара повеќе од 3.800 години. Признато е од NASA како едно од најзначајните праисториски светилишта во светот, сведочејќи за поврзаноста меѓу македонскиот човек и космосот уште од дамнешни времиња.

Езерата на Македонија

Преспанското Езеро, кое се протега меѓу три држави, нуди ретки природни богатства, птици и манастири, додека Дојранското Езеро, со лековитиот муљ и јужната клима, е идеално за летен одмор и рекреација.

Вевчани

Вевчани е селото познато по своите извори и прочуениот Вевчански карневал, кој со векови претставува симбол на хумор, креативност и слободарски дух. Сместено во подножјето на планината Јабланица, Вевчани е место каде природната убавина и локалниот идентитет се спојуваат во неповторливо искуство.

Попова Шапка – Скијачки бисер на Шар Планина

Попова Шапка, на надморска височина од над 1.700 метри, е еден од најпознатите зимски туристички центри во Македонија и пошироко на Балканот. Со современи жичари, уредени патеки и репутација за фрирајд и беккантри скијање, таа е дестинација која секогаш нуди авантура и адреналин.

Пелистер – Национален парк и ски-центар

Во југозападниот дел на Македонија се издига Баба Планина со врвот Пелистер висок 2.601 метар. Овој национален парк, прогласен уште во 1948 година, е дом на ретки видови и ендемската молика. Пешачките патеки водат до Пелистерските Очи – две глечерски езера на надморска височина од 2.200 метри. Во подножјето се наоѓа Битола, град богат со култура, музика и историја.

Матка – Кањонот на Треска

Кањонот Матка, познат по пештерата Врело, најдлабоката подводна пештера на Балканот и втора по длабочина во Европа, е едно од највпечатливите природни чуда во близина на Скопје.

Смоларе – Водопад на Беласица

Смоларскиот водопад, висок 39 метри, е највисокиот во Македонија. Сместен кај селото Смоларе во струмичкиот регион, тој претставува вистинска атракција до која се стигнува по живописна патека со стотици скалила.

Струга

Струга е град на брегот на Охридското Езеро, познат по своите плажи, кафулиња и летен живот. Со својата топла атмосфера, таа е вистинско место за одмор на телото и душата.

Македонија е земја што ги спојува духовноста, традицијата и природата. Секое нејзино катче крие приказна што вреди да се доживее.