КОЧАНИ, градот во кој не си само роден, тука си научил што значи љубов, припадност и гордост. Градот на оризот, на убавата песна, на луѓето со чиста душа. Кочани, град во источниот дел на Република Македонија со 24.632 жители. Градот лежи во Кочанското Поле и е познат по кочанскиот ориз и геотермалната вода.
Кочани лежи на 350 до 450 метри надморска височина. Во близина на Кочани е познатото зимско туристичко средиште Пониква, до кое води асфалтиран пат во одлична состојба, долг околу 20 км. Градот Кочани се наоѓа на 120 км оддалеченост од главниот град Скопје.
Кочани е древен, но секогаш млад во духот. Под оваа почва се кријат спомени од антички времиња, од градби и луѓе што оставиле трага – од римски терми до ослободителни движења.
За првпат во пишан документ, Кочани е спомнат во 1377 година во една грамота, во која деспотот Јован Оливер му ја доделил црквата „Св. Димитрија“ на градот. Според овој документ, градот постоел многу порано од 1337 година бидејќи црквата веќе имала сопствен имот, вклучувајќи го и селото Јастребница (денешно Јастребник). Подоцна, овде завладеале феудалци и потоа Османлиите.
Кочанскиот ориз не е само земјоделски производ, тоа е симбол и идентитет. Оризовите полиња се огледало на трудот, љубовта и истрајноста на кочанскиот народ. Вековната традиција продолжува и денес, со жетви кои се претворени во празник.
Кочани е домаќин на Драмскиот аматерски фестивал (ДАФ) – културна манифестација од национален карактер што се одржува секоја година во мај. „Денови на оризот“ ја слават жетвата и традицијата на белото злато, а „Петровденски конаци“ го одбележуваат празникот на градот – Петровден.
Книжевниот клуб „Копнеж“ при библиотеката „Искра“ е носител на уште две значајни културни настани: Детскиот поетски фестивал „Мајски цвет“ и „Месец на книгата“.
ФК „Осогово“ е најпознатиот спортски симбол на Кочани, а покрај него активно делуваат и кошаркарски, боречки и ракометни клубови кои ја збогатуваат спортската сцена на градот.
